انا (لا وارغو) ..لا ( ءافياني )
رأس حربه فى ( تيم ) الشعب الثورى الغالى
شعر :هاشم صديق
(1)
التكوين
إسمي ( خميس)
ود ( كوة) العاتي.
كان (عجلاتي) .
وأُمي ( مهيرة)
وأبوها ( بشارة)
كان ( ساعاتي) .
..........
أبوي من ( بارا)
وأمي إتولدت
في حِلّة غميسة
ما بتنشاف
في أي خريطة
بأي طريقه
بأي شطارة
كان بي عين
أو نضارة .
.........
أمي وأبوي
صدفة اتلاقو
في الدنيا الشاسعه
والرحمة الواسعه
في (قطر الهم )
الدرجة الرابعه .
.............
كانو ( عوايل)
في السفر الصُدفه
ملح ومُلاح
ونسه وعرفه
( تسالي) و( تُرمس)
وقهوه ( بقرفه ).
وفي الونسه السمحه
في القطر الزحمه
قلْب ( الوالد)
حنّ .. ورفّ
وقلْب ( الوالده)
اتخجّ وخفّ.
.........
بعد شهرين
صبحو اتنين
زوجين طيبين
اتلمو في أسره
في بيت في (البقعه)
وسط ( العرضه) .
............
أبوي فقران
لكن بدَباره
مهَر الوالده
كان (سحاره) (1)
تلاته جنيه
سعفه .. وورده
و( فِركه ) و (فرده ) .
تبروقه ومصحف
و ( بمبر).. و (مبخر)
تربيزه يتيمه
نص دسته كبابي
كفتيره قديمه
وكم (هبّابي )
بحبال مُنشَده .
جابونا تلاتة
( بتّين) و (وليد)
ربّونا ( بكسره )
كسونا السُتره
شربنا اللبن
الصافي الأصلي
ما اتمطّقنا
اللبن ( البُدره )
شَبّينا كِبِرنا
فِهِمنا نَطَقَنا
وكِسْبنا القُدره .
.........
وأنا كنت ( مقرّم )
و ( ود تفتيحه )
والدنيا دي كانت
طيبة فسيحه
سينما (برمبل)
باسطة (بَيَّن) (2)
( التُرماج )
حبوبه عجوبه
و ( النفاج ) .
قصبة سُكر
و ( عنكوليب )
( نبله ) قويه
و( قلوبيه ) (3)
شَرَك للطير .
رحلة عيد
لجزيرة توتي
أو الباقير.
شدر ( كافوري)
( سواقي الحاج )
( جنينة النزهه) (4)
( زنكي اللحمه)
السوق الزحمه
و ( قهوة نوري)
والدافوري
قيامه .. عجاج .
.............
أنا كنت حريف
والكوره شُراب
أحاوْر النمله
في ( جُحر الضب)
وأبهدّل أجندّل
أشطر ( باك)
أو ( هبّاك)
أفْرشو رَرَرَب .
روضَت الكوره
بدَل مأسورها
بقت مأسورتي
( المجنونة)
( بت الكلب) .
............
وأترقيت ( للتيم )
الأول
في ( الكُتاب )
وكبرت بقيت
مفتّل و شاب.
ءاتنورت
عن الأوطان
وإتفتحت
علي ( الاحزاب )
- (العرضة جنوب )
- ( العرضة شمال)
- ( خور ابو عنجة )
- ( بيت المال)
- ( شارع الطابية)
- ( تيم )الطاغية
- ( كار) المافيا
- (جنينة سيدي )
- سور القُبه
- (ضرايح بحري)
- (شرايف بري )
- رافع الراية
- ( تيم القعده)
والاندايه .
- ناس شاشاما
نادي شليل
- ( الحوليه )
دَقَ النوبه
في حمد النيل.
- (السامراب )
نادي ( الكاب)
……. والخ
والخ
بخّا بخ
في العجن .. اللخ .
............
ولأني حريف
وود لعّاب
سكتني عيون
من باب
لي باب .
إتسجلت
في تيم مغمور
مرقت سريع
لي تيم مشهور.
والبلد أتيام
والناس أقسام .
شارع خاص
شارع عام
( أتيام ) فارعين
( أتيام ) أقزام .
أحزاب فارعين
أحزاب أعلام .
دروب وحروب
صدام وكلام .
وأنا كنت
( خميس)
ود كوه العاتي
بقيت ( موضوع )
تصفيق وشيوع
مرات ( محبوب)
أحس بسلام
ومرات ( أتخاف )
تقول بعاتي .
مرات ( إخلاص
لشعار التيم )
مرات معدود
في الحال متواطي .
(2)
الوعي
من ( تيم ) الشوف
الضيق ضِقتَ
إتأملت الحال
المايل
وشفت الناس
في خصام وقبايل.
فكيت تسجيلي
بايدي وعقلي
وأتسجلت
في ( تيم ) الشعب
الغالي الثوري
وأنا أصلي
مصحصح
و (ود تفتيحه)
ولاعب فقري .
مرقت سريع
من ( ضيق الحاره)
للميدان الواسع
دوغري.
أنا لا ( وارغو )
ولا ( إيفياني)
لا ( ود طمبل)
لا ( مساوي)
إتسجلت
بحق طعمية
( شُراب ) مقدود
و( كداره ) هديه
وكيس تمباك
وإتفننت أكون
( رأس حربه)
وإتجننت عديل
في ( المحور)
وإتقطعت
أكون ( مسّاك )
إتراقبت كتير
بالصف
وإتكعبلت كتير
من خلف .
ولأني ( خميس )
ود ( كوه ) العاتي
أقع وأقوم
كمان ( سداري )
تقول عجلاتي .
( وقعت ) كتير
لكني ( وقفت)
(حاورت) دفرت
بعزم الشعب
وصلت المرمي
كم سددت
كم سجلت
كم دافعت
كم مررت .
كم قومت
نَفَس عرَاضه
مع اني مراقب
ديمه بلاعب
لاصق فيني
كأنو ( قراده )
ومرات ممسوك
بي زول عتّالي
جابوهو عشاني
خصوص
من ( مالي)
شعارو الغالي
لا ( باص)
لا بَصّه
يتابع يراقب
تقول مُرسال
من ( جهة مختصه).
لكني طرحتو
جمعتو .. قسمتو
جدعتو بعيد
في بره الخط
إتمدد يقنت
زي ( ضكر البط) .
.............
ولأنو ( الكوره )
والدنيا الصعبه
بحر ممدود
لا حد .. لا شط
إتعذّبت
في درب ( الواقع)
أكتر .. وأكتر
التحكيم الفاشل ياما
شَهَر في وشي
( الكرت الاصفر)
ومره ( الاحمر)
وجرايد (النَِقه)
كانت أخطر.
ألف إشاعه
وكم شماعه
سموم وحُراب
دمار وخراب .
كم سووني
بعتَ وخنتَ
أو ساومت
وإتقاعست .
( بعت قضية )
قبضت رهاب
وإتهافت عديل
لي ( والي )
أو دقيت في السر
لي ( باب )
وإتوسلت
عيون ( أرباب)
مع إني ( خميس )
ود ( كوه ) العاتي
( ود تفتيحة )
مصحصح وفقري .
مرقت عديل
من باب الحاره
الضَيّق ضايق
للميدان الواسع
دوغري.
فكيت تسجيلي
بإيدي وعقلي
وإتسجلت في تيم
الشعب الغالي
الثوري .
(3)
الجَمُر
صباح يوم داكا
يوم ما ( وارغو )
باع كرعينو
بالدولار
وسعر ( التِيوّه )
صار مليار
صحيت ( ملسوع )
قرصني الجوع
فركت عيوني
شفت الدار .
..........
صباح الخير
علي ( ماسوره)
نازله (شخير ) .
صباح النور
علي ( الأسلاك )
من امبارح
وقاطْع النور .
صباح الخير
علي ( الرادي )
وكت ورجَق
كلامو نزل
تقول حسع
رماهو جمل
في نص الخور .
صباح الخير
علي ( الثوره )
وكت صبح الهتاف
في ( الكوره )
والتحكيم .
صباح الخير
علي ( الفيلا )
علي المليار
وجيب الشعب
صام ايامو
من مليم
وصار هلكان
وياكل نيم .
...........
صباح الخير
صحيت كحيان
مشيت كسلان
علي ( الكنتين )
لقيت في غفله
زادو الشاي
( دقيق الفينو )
طار لي فوق
عديل رفرف
علي ( الهبباي ).
تبنت الزيت
لقيت الزيت
يقول يا ريت
صبح حاوي
يقيف ويرقص
عديل في ( الخيت ) .
و ( الفتريته )
رفعت راسا
واتنفشت
تقول زرعوها
في ( لاهاي )
تقول جابوها
من أمريكا .
...........
صعب أصبح
( سواد الناس )
يضوقو
الكسره بي ويكا.
............
صباح الخير
علي ( الأحزاب )
فك تسجيل
وهجرة عديل
ولعبه شليل
ضحك بدموع
ودمع الشعب
ما صافح
عيون منديل .
صباح الخير
علي ( التوزير )
علي ( التنطيط )
علي التبديل .
صباح الخير
علي ( الأمثال )
علي ( الأعراف )
علي ( الجوكيه )
والصراف .
..........
شكيتكم ءانتو
لا ( للفيفا )
لا ( للكاف )
شكيتكم للذي
ما ردّ يوم مظلوم
ولا أهمل
نصوص انصاف .
(4)
التوقيع
ءاسمي ( خميس )
ود ( كوه ) العاتي
كان عجلاتي .
وأمي ( مهيره )
أبوها ( بشاره )
كان ساعاتي .
أنا ( ود تفتيحه )
من ( الدافوري )
ولاعب فقري
مرقت سريع
من ( تيم ) ( الشُله )
علي الميدان
الواسع دوغري.
واتسجلت
في ( تيم ) الشعب
الغالي الثوري.
............
أنا لا ( ساركوزي )
لا ( أوباما )
لا ( أوبينا )
لا ( كامارا)
أنا لا ( سيدا)
لا ( مساوي )
لا (ود طمبل )
لا ( ايفياني )
ءاتسجلت
بـ( كيس طعميه)
شُراب مقدود
و (كداره )هديه
واتفننت
أكون ( راس حربه )
واتجننت عديل
في ( المحور )
واتقطّعت
أكون ( مسّاك )
تعليقات